في حياتي لم مر علي طالب واحد كان يطلب وظايف..

بالنسبة الي احنا بننظر للوظائف بنية حسنة ولكن استخدامنا الها هو سلبي! او مش سلبي وانما غير مجدي وغير مُضر.

لو كل معلم يسأل حاله ليش بيعطي وظائف لطلابه رح ينتج اكثر من جواب.

ممكن يكون السبب عشان جاي عباله, ممكن يكون السبب انه المدرسة فرضت عليه, ممكن يكون السبب عشان الطالب يراجع المادة, ممكن يكون السبب عشان يحسس الطالب شو يعني التزام.

وممكن يكون السبب انه مفكر حاله بس هو اعطى طلابه وظيفة.

وانتبهوا عاخر نقطة!

عن نفسي بطلت اعطي الطلاب وظايف، أولا لأنها مش مقياس لاشي بالمرحلة الثانوية، وثانيا لأنه إعطاء الوظايف بشكل او بآخر بيزيدش وبينقصش اشي عمستوى الطالب، في النهاية الطالب المجتهد رح يحل الوظيفة، وغير المجتهد يا مش رح يحلها يا رح ينقلها. ويا رح يعتبره المعلم حل وخلصنا وبهيك مستفادش الطالب اشي يا رح يكتشف الاشي ويبهدله او يتخذ اي اجراء مناسب.

لهيك بالنسبة الي الوظيفة اللي ممكن تنحل بالبيت بتنحل بالصف مع الطلاب، فش وقت؟؟؟ بس مهو اذا المهم نمرر مواد ونمشّي ونعلّم هوا ومش مهم اذا الطالب فهم ولا لا عشان نحط صح وننتقل للي بعده هذا مش حل، الطالب اهم من المادة وأهم من الامتحان!

الطلاب اللي بالاخر بيقيّمونا مش احنا بنقيّمهم..وكل طالب ” فاشل ” هو تقييم لمعلم فاشل، انا استخدمت كلمة فاشل مع انه الفشل حالة ومش صفة، حالة قابلة للتغيير، بس احنا بنستخدم مصطلحات متطرفة وقطبية بتقييمنا، ناجح وفاشل.

لو ننظر للاشي بالمرحلة الابتدائية فالوظايف هي نوعا ما طريقة قسرية لإجبار الأهل المراجعة مع اولادهم.

اه اقعد مع ابنك وفهمه المادة اللي المعلم ما لحقش يفهمه اياها او اللي ابنك مفهمهاش لأي سبب كان بجوز لمشاكل التركيز او لانه كان نعسان او جعان او تعبان ..او يمكن لأنه في 30 طالب وعشان ابنك يوخذ حقه من الاهتمام الفردي بطلعله اقل من دقيقة من الحصة.

فابنك او ولادك اللي عددهم x لازمه/م كمان معلم بالدار يعلمه/م من جديد او يوفرله/م النقص اللي كان عنده/م بالحصة !
بس عادي انه في طلاب عندهم اهل يقعدوا معهم ويحلوا ويفهموا…واللي معندهمش؟ راحت عليهم..عادي اللي اهله بشتغلوا وبيروحوا فش حيل ولا قوة ولا اعصاب كمان عادي.

لهيك الوظايف اللي بتفيد طلاب وبتفيدش طلاب مش مقياس بنظري.. لأنه مدارسنا للأسف بتعتمد أسلوب اللي بحسبه الطالب اللي ملوش اهل يقعدوا عحواسه راحت عليه..فما بتشكل بديل وما بتشتغل على توفير طرق تعليمية اللي بتناسب كل الطلاب بكل الظروف !

وهيك الطالب بينقبر بنفس المحل وبيتخلّف تعليميا لسنين. وبينزاد كرقم

,ألآراء, الوقائع والمحتوى المطروحين هنا يعكسون المؤلف فقط لا غير. موقع تايمز أوف اسرائيل لا يتحمل أي مسؤولية, عن حالات ألاسائة أبلغ هنا.